It-Trasferiment ta’ Data Personali lil pajjiżi mhux tal-UE: Klawżoli Kuntrattwali Xierqa

 

SOMMARJU TA’:

Id-Deċiżjoni 2010/87/UE dwar klawżoli kuntrattwali standard għat-trasferiment ta’ data personali għall-proċessuri stabbiliti f’pajjiżi terzi, taħt id-Direttiva 95/46/KE

X’INHU L-GĦAN TAD-DEĊIŻJONI?

Din tistabbilixxi klawżoli kuntrattwali xierqa li jistgħu jintużaw mill-kontrolluri tad-data* (esportaturi) fl-UE li jittrasferixxu data personali* lill-proċessuri tad-data* (importaturi) stabbiliti barra mill-UE jew iż-ŻEE, biex jipprovdu salvagwardji xierqa tal-protezzjoni tad-data u b’hekk jikkonformaw mar-rekwiżiti tal-liġijiet tal-UE dwar il-protezzjoni tad-data(ir-regolament ġenerali dwar il-protezzjoni tad-data — ir-Regolament (UE) 2016/679 — ara s-sommarju).

PUNTI EWLENIN

Il-klawżoli kuntrattwali xierqa huma stabbiliti fl-anness tad-deċiżjoni kif ġej. Il-klawżoli kuntrattwali xierqa jirrelataw biss mal-protezzjoni tad-data u jistgħu jiġu inklużi mill-partijiet f’kuntratt usa’ jew jiġu supplimentati bi klawżoli oħrajn jew salvagwardji addizzjonali, sakemm ma jmorrux kontra, direttament jew indirettament, il-klawżoli kuntrattwali xierqa adottati b’din id-deċiżjoni.

Klawżola 1: Definizzjonijiet

Id-definizzjonijiet ta’ kunċetti ewlenin użati fil-klawżoli kuntrattwali xierqa huma stabbiliti.

Klawżola 2: Dettalji tat-trasferiment

Il-partijiet għandhom jelenkaw, f’anness għall-klawżoli kuntrattwali, id-dettalji tat-trasferimenti, inklużi l-attivitajiet rilevanti tal-importatur u l-esportatur tad-data, il-kategoriji ta’ data personali trasferita u l-operazzjonijiet ta’ pproċessar li d-data personali se tiġi soġġetta għalihom ladarba tiġi trasferita.

Klawżola 3: Klawżola tal-parti terza benefiċjarja

Il-klawżola tippermetti lis-suġġetti tad-data jinfurzaw bosta mill-klawżoli kontra l-esportatur tad-data, l-importatur tad-data jew is-sottoproċessur bħala benefiċjarju ta’ parti terza. Barra minn hekk, tipprovdi li l-partijiet ma joġġezzjonawx għal suġġett tad-data li jkun irrappreżentat minn assoċjazzjoni jew korp ieħor jekk permess mil-liġi nazzjonali.

Klawżola 4: Obbligi tal-esportatur tad-data

Din il-klawżola tistabbilixxi l-obbligi kuntrattwali tal-esportatur tad-data, li għandu jaqbel u jiggarantixxi li:

• jipproċessa d-data personali biss skont il-liġi dwar il-protezzjoni tad-data;
• jagħti istruzzjonijiet lill-importatur tad-data biex jipproċessa d-data f’isem l-esportatur tad-data biss u skont il-liġi tal-protezzjoni tad-data u l-klawżoli;
• jipprovdi (u jikkonforma ma’) garanziji suffiċjenti fir-rigward ta’ miżuri tekniċi u organizzattivi ta’ sigurtà biex jipproteġu d-data personali kontra qerda aċċidentali jew illegali, telf, alterazzjoni, żvelar jew aċċess mhux awtorizzat, b’mod partikolari fejn l-ipproċessar ikun fuq network;
• jinforma lis-suġġett tad-data jekk kategoriji speċjali ta’ data jistgħu jiġu trażmessi lil pajjiż mhux tal-UE bi protezzjoni tad-data inadegwata;
• jibgħat in-notifika li jkun irċieva mill-importatur tad-data dwar in-nuqqas ta’ kapaċità ta’ dan tal-aħħar li jikkonforma mal-klawżoli lill-awtorità superviżorja kompetenti, jekk jiddeċiedi li jkompli t-trasferiment;
• jagħmel disponibbli lis-suġġetti tad-data, fuq talba, kopja tal-klawżoli, b’deskrizzjoni fil-qosor tal-miżuri tas-sigurtà;
• fil-każ ta’ sottoproċessar, is-sottoproċessur għandu jipprovdi mill-inqas l-istess livell ta’ protezzjoni tad-data personali bħall-importatur tad-data.

Klawżola 5: Obbligi tal-importatur tad-data

Din il-klawżola tistabbilixxi l-obbligi kuntrattwali tal-importatur tad-data, li għandu jaqbel u jiggarantixxi:

• li jipproċessa d-data personali biss f’isem l-esportatur tad-data u f’konformità mal-istruzzjonijiet u l-klawżoli tiegħu;
• li ma għandu l-ebda raġuni biex jemmen li l-leġiżlazzjoni applikabbli għalih ma tippermettilux li jissodisfa l-istruzzjonijiet riċevuti mill-esportatur tad-data u l-obbligi tiegħu skont il-kuntratt;
• li jinnotifika minnufih kwalunkwe bidla f’din il-leġiżlazzjoni li x’aktarx ikollha effett negattiv sostanzjali fuq il-garanziji u l-obbligi pprovduti mill-klawżoli, f’liema każ l-esportatur tad-data jkun intitolat jissospendi t-trasferiment tad-data u/jew itemm il-kuntratt;
• li jimplimenta miżuri tekniċi u organizzattivi tas-sigurtà speċifikati qabel ma jipproċessa d-data personali ttrasferita;
• li jinnotifika minnufih lill-esportatur tad-data dwar talbiet għall-iżvelar ta’ data personali minn awtorità tal-infurzar tal-liġi, kwalunkwe aċċess aċċidentali jew mhux awtorizzat, u kwalunkwe talba li tasal direttament mis-suġġetti tad-data mingħajr ma jwieġeb għat-talba, sakemm ma jkunx awtorizzat mod ieħor;
• li jittratta minnufih il-mistoqsijiet kollha mill-esportatur tad-data u li jirrispetta l-parir tal-awtorità superviżorja;
• fuq talba tal-esportatur tad-data, li jissottometti l-faċilitajiet tiegħu għall-ipproċessar ta’ data għall-verifika tal-attivitajiet tal-ipproċessar koperti mill-klawżoli;
• li jagħmel disponibbli lis-suġġetti tad-data, fuq talba, kopja tal-klawżoli, b’deskrizzjoni fil-qosor tal-miżuri tas-sigurtà;
• li jikri sottoproċessur biss b’kunsens bil-miktub minn qabel tal-esportatur tad-data.

Klawżola 6: Responsabbiltà

Il-klawżoli jirrikjedu li l-partijiet jaqblu li kwalunkwe suġġett tad-data li jkun sofra danni bħala riżultat ta’ kwalunkwe ksur tal-obbligi huwa intitolat li jirċievi kumpens mill-esportatur tad-data għad-danni mġarrba.

Klawżola 7: Medjazzjoni u ġuriżdizzjoni

L-importatur tad-data għandu jaqbel li jekk is-suġġett tad-data jinvoka kontrih id-drittijiet ta’ parti terza benefiċjarja u/jew jitlob kumpens għad-danni, dan jaċċetta d-deċiżjoni tas-suġġett tad-data li jirreferi t-tilwima għal medjazzjoni indipendenti, jew lill-qrati fil-pajjiż tal-UE fejn l-esportatur tad-data huwa stabbilit (bid-dritt li jfittex rimedji taħt liġijiet nazzjonali jew internazzjonali oħra).

Klawżola 8: Kooperazzjoni mal-awtoritajiet superviżorji

Din il-klawżola tirregola l-kooperazzjoni mal-awtorità superviżorja kompetenti, billi tipprovdi li:

• l-awtorità superviżorja għandha d-dritt li twettaq verifika tal-importatur tad-data, u ta’ kwalunkwe sottoproċessur;
• l-importatur tad-data jaqbel li jinforma lill-esportatur tad-data dwar kwalunkwe leġiżlazzjoni li ma tippermettix verifika tal-importatur tad-data. F’każ bħal dan l-esportatur tad-data għandu jkun intitolat li jissospendi t-trasferiment tad-data jew itemm il-kuntratt.

Klawżola 9: Liġi regolatorja

Il-klawżoli għandhom jiġu rregolati mil-liġi nazzjonali tal-pajjiż tal-UE li fih huwa stabbilit l-esportatur tad-data.

Klawżola 10: Varjazzjoni tal-kuntratt

Il-partijiet m’għandhomx ivarjaw, jimmodifikaw jew jikkontradixxu l-klawżoli.

Klawżola 11: Sottoproċessar

Id-dispożizzjonijiet relatati mas-sottoproċessar għandhom jiġu rregolati mil-liġi tal-pajjiż tal-UE li fih huwa stabbilit l-esportatur tad-data.

Klawżola 12: Obbligu wara t-terminazzjoni tas-servizzi tal-ipproċessar ta’ data personali

Din il-klawżola tirregola l-obbligi tal-partijiet wara t-tmiem tal-ipproċessar ta’ data. B’mod partikolari, il-partijiet għandhom jaqblu li fl-aħħar tas-servizzi tal-ipproċessar ta’ data, l-importatur tad-data u s-sottoproċessur għandhom jirritornaw (jew jeqirdu, fuq talba) id-data personali kollha ttrasferita sakemm dan ma jkunx ipprojbit mil-leġiżlazzjoni.

MINN META ILHA TAPPLIKA D-DEĊIŻJONI?

Din ilha tapplika mill-15 ta’ Mejju 2010.

SFOND

• Nota: din id-deċiżjoni kienet is-suġġett ta’ talba għal deċiżjoni preliminari li wasslet għas-sentenza tal-Qorti tal-Ġustizzja tal-UE (Kawża C-311/18) tas-16 ta’ Lulju 2020, li fiha l-Qorti kkonfermat il-validità tad-deċiżjoni.
• Il-Kummissjoni Ewropea ħarġet ukoll 2 settijiet ta’ klawżoli kuntrattwali xierqa għat-trasferimenti tad-data minn kontrolluri tad-data fl-UE għall-kontrolluri tad-data stabbiliti barra l-UE jew iż-ŻEE.
• Ara wkoll:
  • Il-protezzjoni tad-data (Kummissjoni Ewropea).

TERMINI EWLENIN

DOKUMENT EWLIENI

Id-Deċiżjoni tal-Kummissjoni 2010/87/UE tal-5 ta’ Frar 2010 dwar klawżoli kuntrattwali standard għat-trasferiment ta’ data personali għall-proċessuri stabbiliti f’pajjiżi terzi, taħt id-Direttiva 95/46/KE tal-Parlament Ewropew u tal-Kunsill (ĠU L 39, 12.2.2010, pp. 5-18)

L-emendi suċċessivi għad-Deċiżjoni 2010/87/UE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1-88)

Ara l-verżjoni konsolidata.

Id-Deċiżjoni tal-Kummissjoni 2004/915/KE, tas-27 ta’ Diċembru 2004, li temenda d-Deċiżjoni 2001/497/KE fir-rigward tal-introduzzjoni ta’ sett alternattiv ta’ klawżoli standard kontrattwali għat-trasferiment ta’ data personali lil pajjiżi terzi (ĠU L 385, 29.12.2004, pp. 74-84)

Id-Deċiżjoni tal-Kummissjoni 2001/497/KE tal-15 ta’ Ġunju 2001 dwar klawżoli standard kontrattwali għat-trasferiment ta’ data personali lil pajjiżi terzi, skont id-Direttiva 95/46/KE (ĠU L 181, 4.7.2001, pp. 19-31)

Ara l-verżjoni konsolidata.

Id-Direttiva 95/46/KE tal-Parlament Ewropew u tal-Kunsill tal-24 ta’ Ottubru 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data (ĠU L 281, 23.11.1995, pp. 31-50)

Ara l-verżjoni konsolidata.

l-aħħar aġġornament 07.10.2020